Ta’ spiss niltaqa' ma' nies li jgħiduli kemm f'pajjiżna, speċjalment fil-lokalitajiet tal-Marsa u l-Ħamrun hawn wisq barranin, speċjalment immigranti Afrikani li kienu daħlu f’pajjiżna b’mod illegali. Kliem bħal dan ġieli nisimgħu ukoll min-nies li jgħixu fil-kumplament tal-lokalitajiet l-oħra li jiffurmaw parti mill-ewwel distrett elettorali. Jgħiduli l-post fejn ngħixu nbidel u m’għadux l-istess kif kienu jafuh sa ftit taż-żmien ilu. In-nies jikkummentaw hekk mhux għax huma razzisti, imma għaliex xi wħud minn fost din il-komunita’ jagħtuhom fastidju jew iwettqu atti llegali, bħal serq, vandaliżmu, iħammġu barra u jdejquhom bl-istorbju.

Ma nistawx ngħaddsu rasna fir-ramel u ngħidu li din il-problema ma teżestix. Ma nistawx inħeġġu lill-Maltin biex jibdlu drawwiethom u jaċċettaw dak li mhux aċċettat fin-normi tas-soċjeta’ Maltija. Jien nifhem sew it-tħassib u l-inkwiet ta’ dawn ir-residenti! Nifhmu sew, għaliex jien ukoll resident f'dawn il-lokalitajiet. L-inkwiet li għandhom huma, huwa l-inkwiet tiegħi! Li jħossu huma, nħossu jien, għaliex jien wiehed minnhom!

Is-soluzzjoni mhix faċli. Faċli tgħid inkeċċu lil kulħadd meta taf li l-ebda liġi internazzjonali u lokali mhu se tippermettilek tagħmel dan. Kliem bħal dan iwassal biss biex tikber il-firda. Li ngħidu li nifhmu l-problema hu biżżejjed? Dażgur li le! Imma bil-kritika biss ma naslu mkien.

Tul dan l-aħħar żmien, Gvern Laburista immexxi minn Dr. Robert Abela ħadem kemm felaħ, u għadu għaddej b' ħidmietu sabiex din il-problema tal-immigrazzjoni tittaffa. Saru kuntatti mal-Libja biex dawn iħarsu aħjar ix- xtut tagħhom, bil-għan li anqas dgħajjes jitilqu mix- xtut Libiċi. Huwa stmat li minn Marzu sal-lum l-awtoritajiet Libjani ma ħallewx ibaħħru lejn Malta iżjed minn 6,000 immigrant din is-sena. Frott din il-ħidma din is-sena s’issa waslu Malta inqas min-nofs tas-sena li għaddiet.

L-għajnuna li nistgħu noffru lil-Libja u pajjiżi Afrikani hija neċċeserja sabiex anqas persuni jkollhom il-ħtieġa li jħallu pajjiżhom. Ovvjament ma’ dawn il-pajjiżi rridu naħdmu sabiex jittieħdu passi kontra it-traffikanti tal-bnedmin.

Il- gvern ħadem sabiex jipproteġi biss dgħajjes li jkunu f'diffikulta kbira b' possibilita li jintilfu l-ħajjiet. Xogħol il- gvern jibqa' illi filwaqt li ma jħallix ħajjiet jintilfu, jara li dawn l- immigranti jigu ripatrijati.

Hu hawn fejn mhux qed insibu appoġġ biżżejjed. Bejn l-2005 u l-2020 il-pajjiżi l-oħra tal-Unjoni Ewropea ħadu biss 8 minn kull 100 li waslu Malta. Dan meta ħafna minn dawn il-membri kienu kolonizzaturi ta' ħafna mill-pajjiżi Afrikani minn fejn ġejjien l-immigranti llegali.

Nifhem perfettament lil min jinkwieta dwar il-kriminalita’. Il-gvern qiegħed jagħmel ħiltu biex iċ-ċittadini jkunu protetti. Żdiedu l-Pulizija fit-toroq li qed jagħmlu xogħol tajjeb ħafna. Ta' dan nirringrazjahom. Biss, jien bħalkom nemmen li Pulizija waħdu ma jista' jagħmel xejn. Il-penali jridu jkunu ta' deterrent. Imma dan hu xogħol il-qorti. Allaħares il-Gvern jew il- Prim Ministru jindahal x'sentenzi jingħataw minn xi Maġistrat. Ikun qed imur kontra l-prinċipju tas-separazzjoni tal-Gvern u l-ġustizzja.

Dan is- suġġett hu wieħed delikat ħafna, għax jolqot liċ-ċittadini kollha. Hemm bżonn li bħala pajjiżn iġbdu l-istess ħabel. Kultant lanqas nemmen li ssib min jiftaħ kawżi kontra Malta għax ma daħħalniex xi immigranti.

Bħal issa għandek fuq naħa Gvern li qed jaħdem sabiex din il-problema tittaffa u fuq naħa għandek nies li jaraw kif itellfu l- ħidma tal-Gvern b' akkużi u kawżi fil-qrati

Għax jien ċittadin u resident bħalkom fil-lokalitajiet milquta, se nkompli nagħti l-appoġġ tiegħi lill-Gvern Laburista u nxammar il-kmiem biex naħdem iktar għax hu dan il-Gvern li qiegħed jaghmel ħiltu kollha fuq din il-problema.